గిరిజనుల సంక్షేమానికి ప్రభుత్వం కట్టుబడి ఉంది

• సీఎం రేవంత్ రెడ్డి
• గాంధీ భవన్‌లో కాంగ్రెస్ గిరిజన శాఖ నూతన కమిటీ ప్రమాణ స్వీకారం

మిర్యాలగూడ ప్రతినిధి, ఆర్గాన్ న్యూస్, జనవరి 8:

హైదరాబాద్‌లోని గాంధీ భవన్ నందు బుధవారం తెలంగాణ రాష్ట్ర గిరిజన శాఖ కాంగ్రెస్ కమిటీ నూతన కార్యవర్గ ప్రమాణ స్వీకార కార్యక్రమం ఘనంగా జరిగింది. ఈ సందర్భంగా గిరిజన శాఖ కాంగ్రెస్ కమిటీ చైర్మన్‌గా నూతనంగా ఎన్నికైన ఎంఎల్సీ కేతావత్ శంకర్ నాయక్ తో పాటు కమిటీ సభ్యులు ప్రమాణ స్వీకారం చేశారు.
కార్యక్రమానికి ముఖ్య అతిథిగా హాజరైన ముఖ్యమంత్రి రేవంత్ రెడ్డి నూతన కమిటీని అభినందించారు. గిరిజనుల సంక్షేమం, అభివృద్ధికి కాంగ్రెస్ ప్రభుత్వం పూర్తి స్థాయిలో కట్టుబడి ఉందని ఆయన స్పష్టం చేశారు. పార్టీ సంస్థాగత బలోపేతంలో గిరిజన శాఖ కీలక పాత్ర పోషించాలని ఆయన సూచించారు.
ఈ కార్యక్రమంలో తెలంగాణ ప్రదేశ్ కాంగ్రెస్ కమిటీ అధ్యక్షులు మహేష్ కుమార్ గౌడ్, పలువురు మంత్రులు, మిర్యాలగూడ శాసనసభ్యులు బత్తుల లక్ష్మారెడ్డితో పాటు కాంగ్రెస్ పార్టీ సీనియర్ నాయకులు, కార్యకర్తలు పెద్ద సంఖ్యలో పాల్గొన్నారు.
నూతనంగా ఏర్పడిన గిరిజన శాఖ కాంగ్రెస్ కమిటీ రాష్ట్రవ్యాప్తంగా గిరిజనుల సమస్యల పరిష్కారం, సంక్షేమ పథకాల సమర్థ అమలు, పార్టీ బలోపేతం దిశగా చురుగ్గా పనిచేస్తుందని నాయకులు తెలిపారు.