- న్యాయం కోరుతూ రోడ్డెక్కిన కర్షకులు
- పోరండ్లలో ఆందోళన మానకొండూర్, ఆర్గాన్ న్యూస్, డిసెంబర్ 2:
కరీంనగర్ జిల్లా తిమ్మాపూర్ మండలం పోరండ్లలో ధాన్యం కొనుగోలు నిలిచిపోవడంతో రైతుల ఆవేదన గగ్గోలు దాటింది. పండించిన పంట గోదాముల్లా కుప్పలుగా నిలిచి ఉండగా, తూకం ప్రారంభం కాకపోవడం రైతుల కోపాన్ని రగిలించింది. వారం వారం మాటలు చెబుతున్నా, కొనుగోలు మాత్రం ప్రారంభం కానందుకు కర్షకులు మంగళవారం రోడ్డెక్కారు.
సొసైటీ కార్యాలయానికి తాళం వేసి రోడ్డుపై రాస్తారోకో చేపడుతూ తమ నిరసనను తెలియజేశారు. ఈ సందర్భంగా రైతులు తీవ్ర ఆవేదన వ్యక్తం చేశారు.
“నెలరోజులుగా తూకం మాటలు… మా ధాన్యం మాత్రం ఎండలో పాడైపోతుంది”
రైతుల మాటల్లో బాధ పెరిగి ఉబికిపొంగింది. “మా పంటను రాత్రింబవళ్లు కాపలా కాస్తున్నాం… ధాన్యం కుప్పలు పగలు పడి పోతున్నాయి. తూకం వేయాలి, కొనుగోలు మొదలు పెడతాం అని పురపాలకమంటూ వారం వారం మాటలు. కానీ చర్య మాత్రం సున్నా” అంటూ వేదనను వెల్లగక్కారు.
కొనుగోలు కేంద్రం వద్ద వేల క్వింటాళ్ల ధాన్యం పేరుకుపోయి ఉండగా, రైతుల మనసులో భయం ఒక్కటే ఇంకా ఆలస్యం అయితే మా పంట నష్టమవుతుంది.
తరుగు పేరిట దోపిడీ, ఒక్కో బస్తాకు 5 కిలోలు అదనంగా కట్
ఇటీవల 43 కిలోల చొప్పున తూకం వేసి రైస్మిల్లులకు పంపిన బస్తాలకు ‘తరుగు’ పేరుతో మరో 5 కిలోలు అదనంగా కట్ చేయడం రైతులను మరింత ఆగ్రహానికి గురి చేసింది.
పండించిన పంటపైనా దోపిడీ… బస్తా బస్తాకు నష్టం చేస్తే రైతు ఎలా బతుకుతాడు? అని కర్షకులు ప్రశ్నించారు.
మండలంలో పలు కేంద్రాల్లో ఇదే పరిస్థితి
తిమ్మాపూర్ మండలంలోని చిన్న–పెద్ద కొనుగోలు కేంద్రాలన్నింట్లో ఇదే గందరగోళం నెలకొన్నట్లు రైతులు వెల్లడించారు. అధికారులు స్పందించి ముందుగానే చర్యలు తీసుకుంటే రైతులకే గాని, వ్యవస్థకే గాని ఇబ్బందులు ఉండేవి కాదని వారు ఆగ్రహం వ్యక్తం చేశారు.
3 వేల క్వింటాళ్లకు అలాట్మెంట్ జారీ – హామీతో వెనక్కి మళ్లిన రైతులు
రైతుల ఆందోళన పెరుగుతున్న నేపథ్యంలో సొసైటీ అధికారులు స్పందించక తప్పలేదు.
3 వేల క్వింటాళ్ల ధాన్యం కొనుగోలుకు రైస్మిల్లుకు అలాట్మెంట్ జారీ అయ్యిందని, వెంటనే తూకం ప్రారంభిస్తామని హామీ ఇవ్వడంతో రైతులు ధర్నాను విరమించారు.
మా చెమట విలువ చెల్లించండి… ఇబ్బందులు లేకుండా కొనుగోలు జరగాలని రైతుల విజ్ఞప్తి చేశారు.
రైతుల డిమాండ్ సులభమైనదే, కానీ అత్యవసరం ధాన్యం పాడైపోకముందే సకాలంలో ప్రభుత్వ కొనుగోలు ప్రారంభం కావాలి.
కొనుగోలు ప్రక్రియ పారదర్శకంగా ఉండాలని, తరుగు దోపిడీకి అడ్డుకట్ట వేయాలని, సొసైటీలు–అధికారులు సమన్వయంతో పనిచేయాలని రైతులు విజ్ఞప్తి చేస్తున్నారు.
