మానకొండూర్, ఆర్గాన్ న్యూస్, మే 27:
కరీంనగర్ జిల్లా మానకొండూర్ వ్యవసాయ మార్కెట్లో రాత్రి కురిసిన అకాల భారీ వర్షం రైతుల జీవితాల్లో మరోసారి నిరాశ నింపింది. కొనుగోలు కోసం రోజుల తరబడి మార్కెట్ యార్డులో నిల్వ ఉంచిన వరి ధాన్యం పూర్తిగా తడిసిముద్దై భారీ నష్టం వాటిల్లింది. ఉదయం వరకు నీటితో నిండిపోయిన యార్డులో ధాన్యపు కుప్పలు చెదిరిపోయిన దృశ్యం కనిపించింది.
వర్షపు నీరు పెద్ద మొత్తంలో నిల్వ ఉండటంతో మార్కెట్ ప్రాంగణం చెరువును తలపించిందని రైతులు చెబుతున్నారు. తక్షణ డ్రైనేజీ వ్యవస్థ లేకపోవడం, నీరు బయటకు వెళ్లే మార్గాలు సరిగా లేకపోవడం వల్ల పరిస్థితి మరింత విషమించిందని ఆరోపణలు వినిపిస్తున్నాయి. టార్పాలిన్లు లేకపోవడం, ధాన్యాన్ని కాపాడే కనీస సదుపాయాలు లేకపోవడం రైతుల ఆవేదనకు కారణమైంది.
ఇప్పటికే కొనుగోలు ఆలస్యం, లారీలు అందుబాటులో లేకపోవడం, తూకం ప్రక్రియ నెమ్మదిగా సాగడం వంటి సమస్యలతో సతమతమవుతున్న రైతులకు ఈ వర్షం పెద్ద దెబ్బగా మారింది. వందలాది క్వింటాళ్ల ధాన్యం తడిసి పోవడంతో నాణ్యత తగ్గి, మిల్లర్లు తేమ శాతం పేరుతో కోతలు విధించే అవకాశం ఉందని రైతులు ఆందోళన వ్యక్తం చేస్తున్నారు.
“మా కష్టం అంతా వానలో కొట్టుకుపోయింది… ఇక పెట్టుబడి ఎలా తిరిగి వస్తుందో తెలియడం లేదు” అంటూ రైతులు కన్నీటి పర్యంతమయ్యారు. కొంతమంది రైతులు ధాన్యాన్ని చేతులతోనే ఎండబెట్టే ప్రయత్నం చేసినా పరిస్థితి అదుపులోకి రాలేదని తెలిపారు.
మార్కెట్లో ప్రతి వర్షాకాలంలో ఇదే పరిస్థితి ఎదురవుతున్నా శాశ్వత పరిష్కార చర్యలు తీసుకోకపోవడంపై తీవ్ర విమర్శలు వెల్లువెత్తుతున్నాయి. రైతు సంఘాలు వెంటనే తడిసిన ధాన్యాన్ని ప్రత్యేక కేటగిరీగా కొనుగోలు చేయాలని, నష్టపరిహారం ప్రకటించాలని ప్రభుత్వాన్ని డిమాండ్ చేస్తున్నాయి.
శాశ్వత డ్రైనేజీ వ్యవస్థ, గోదాముల నిర్మాణం, వర్ష రక్షణ షెడ్లు ఏర్పాటు చేయకపోతే రైతుల కష్టాలు మరింత పెరుగుతాయని వారు హెచ్చరిస్తున్నారు.
