ధరల నియంత్రణలో కేంద్ర–రాష్ట్ర ప్రభుత్వాలు పూర్తిగా విఫలం

• సిపిఎం డివిజన్ కార్యదర్శి బండి రమేష్ విమర్శలు
• పెట్రోల్, డీజిల్, గ్యాస్ ధరల పెంపుతో సామాన్యులపై భారమన్న సిపిఎం
• “కార్పొరేట్ శక్తులకు కేంద్రం కొమ్ముకాస్తోంది” అంటూ ఆగ్రహం
• బండి భగీరథను వెంటనే అరెస్ట్ చేసి కఠినంగా శిక్షించాలన్న షేక్ బషీరుద్దీన్
• తిరుమలాయపాలెంలో జరిగిన సిపిఎం మండల కమిటీ సమావేశంలో విమర్శల వెల్లువ

తిరుమలాయపాలెం, మే 12 (ఆర్గాన్ న్యూస్):
ధరల నియంత్రణలో కేంద్ర, రాష్ట్ర ప్రభుత్వాలు పూర్తిగా విఫలమయ్యాయని సిపిఎం డివిజన్ కార్యదర్శి బండి రమేష్ తీవ్ర విమర్శలు చేశారు. స్థానిక గజ్జల వెంకటయ్య భవనంలో సిపిఎం మండల నాయకులు అంగిరేకుల నరసయ్య అధ్యక్షతన నిర్వహించిన మండల కమిటీ సమావేశంలో ఆయన ముఖ్య అతిథిగా పాల్గొన్నారు.

ఈ సందర్భంగా బండి రమేష్ మాట్లాడుతూ, ఇటీవల కాలంలో పెట్రోల్, డీజిల్, గ్యాస్ ధరలు విపరీతంగా పెరిగి సామాన్య ప్రజలపై తీవ్రమైన భారం పడుతోందన్నారు. కేంద్ర ప్రభుత్వం ధరలను నియంత్రించడంలో విఫలమైందని, కార్పొరేట్ శక్తులకు అనుకూలంగా వ్యవహరిస్తోందని ఆరోపించారు. ఐదు రాష్ట్రాల ఎన్నికల ఫలితాలు వెలువడిన వెంటనే ఇంధన ధరలు పెంచడం ప్రజలపై మోపిన అదనపు భారమని పేర్కొన్నారు.

ప్రజా పాలన అంటూ చెప్పుకుంటున్న రాష్ట్ర ప్రభుత్వం కూడా ధరల నియంత్రణలో పూర్తిగా ఫెయిల్ అయిందని విమర్శించారు. పెరిగిన నిత్యావసర వస్తువుల ధరలను వెంటనే తగ్గించాలని డిమాండ్ చేశారు.

అనంతరం సిపిఎం జిల్లా కమిటీ సభ్యులు షేక్ బషీరుద్దీన్ మాట్లాడుతూ, మైనర్ బాలికపై అత్యాచారం ఆరోపణలు ఎదుర్కొంటున్న బండి భగీరథను వెంటనే అరెస్ట్ చేసి కఠినంగా శిక్షించాలని డిమాండ్ చేశారు. చట్టం ముందు అందరూ సమానమేనని, నేరస్తులపై రాజీ లేకుండా చర్యలు తీసుకోవాలని అన్నారు.

ఈ సమావేశంలో మండల కార్యదర్శి కొమ్ము శ్రీను, నాయకులు తుళ్లూరు నాగేశ్వరరావు, దాసరి మహేందర్, బింగి రమేష్, వర్షపొంగు వీరన్న, కొలిచలం స్వామి, సైదులు, కొత్తపల్లి వెంకన్న, నెరుసుల వెంకటేశ్వర్లు, కొత్తపల్లి దామోదర్ రెడ్డి, పుట్టల గురువులు ఉపేందర్, బోడ బాలు, కొమ్ము నాగేశ్వరరావు తదితరులు పాల్గొన్నారు.