- ఘనంగా ప్రారంభమైన మేడారం సమ్మక్క సారలమ్మ మహాజాతర
- హనుమంతుని రక్షా కవచం నీడలో సారలమ్మ దేవత మేడారానికి..
- మేడారం ప్రధాన పూజారి సిద్ధబోయిన అరుణ్ కుమార్
ములుగు జిల్లా, ఆర్గాన్ న్యూస్, జనవరి 28:
మేడారం అశేష భక్తజన సందోహం నడుమ ములుగు జిల్లా మేడారంలో సమ్మక్క సారలమ్మ మహాజాతర బుధవారం అత్యంత వైభవంగా ప్రారంభమైంది. జాతర తొలిరోజు ఆచారాల ప్రకారం కన్నెపల్లి నుంచి సారలమ్మ దేవత గద్దెపైకి రాకతో మహాజాతర అంకురార్పణ జరిగింది.
గద్దెల శుద్ధీకరణ బుధవారం ఉదయం 11:00 నుండి 12:00 గంటల మధ్య సమ్మక్క సారలమ్మ పూజారులు గద్దెల వద్దకు చేరుకుని పుట్టమన్నుతో గద్దెలను అలికి శుద్ధి చేశారు.
ఆదివాసీ సంప్రదాయం గొట్టు గోత్రాల ప్రకారం ఆదివాసీ సాంప్రదాయ పద్ధతుల్లో పీఠ ముగ్గులు వేసి అమ్మవార్లకు పసుపు కుంకుమ చీర సారెలను సమర్పించి ధూప దీప నైవేద్యాలతో ప్రత్యేక పూజలు నిర్వహించారు.
సారలమ్మ రాక సాయంత్రం 5:00 నుండి 6:00 గంటల సమయంలో కన్నెపల్లి నుంచి హనుమంతుని రక్షా కవచం నీడ లో సారలమ్మ దేవత బయలుదేరి రాత్రి 9:00 నుండి 10:00 గంటల మధ్య మేడారం గద్దెలకు చేరుకున్నారు.
దేవతల ఆగమనం అదేవిధంగా కొండాయి నుంచి గోవిందరాజులు పూనుగొండ్ల నుంచి పగిడిద్ద రాజులను పూజారులు మేడారం గద్దెలపైకి తీసుకువచ్చి ప్రతిష్టించారు.
కళ్యాణ మహోత్సవం మాఘ శుద్ధ పౌర్ణమి వెన్నెలలో సమ్మక్క అమ్మవార్లకు పగిడిద్ద రాజులకు ఆదివాసీ సంప్రదాయాల ప్రకారం కళ్యాణ మహోత్సవం నిర్వహించనున్నారు.
ఈ సందర్భంగా మేడారం ప్రధాన పూజారి సిద్ధబోయిన అరుణ్ కుమార్ మాట్లాడుతూ భక్తులందరూ అమ్మవార్ల కృపకు పాత్రులు కావాలని ప్రభుత్వం ఆలయ కమిటీ అన్ని ఏర్పాట్లు పూర్తి చేసిందని వారు తెలిపారు.
